Просмотров: 441
2024 жылғы сәуірдің 25 күні С.Сейфуллин атындағы Қазақ агротехникалық зерттеу университеті Ғылыми кеңесінің кеңейтілген жоспарлы мәжілісі өтті. Мәжілісте Басқарма мүшесі – академиялық мәселелер жөніндегі проректор Әбішева Роза Жанысбекқызы төрағалық етті. Дәстүр бойынша мәжіліс марапаттарды табыстау рәсімінен басталды. Күн тәртібіне келсек, келесідей мәселелер бойынша баяндамалар тыңдалып, тиісті шешімдер қабылданды. Атап айтсақ, Экономика факультетінің деканы М.Сабырова жоғары білім беру сапасын арттыру жолындағы жұмыстар туралы есеп берді. Аталған сұрақ бойынша арнайы комиссия тексеру жұмыстарын жүргізген болатын. Комиссия анықтамасы және шешім жобасымен комиссия төрағасы PhD, «Стандарттау, метрология және сертификаттау» кафедрасының меңгерушісі С.Алдабергенова таныстырды. Нәтижесінде, проректор орын алған кемшіліктерді жою бойынша іс-шаралар жоспарының Жол картасын әзірлеуді тапсырды.
Келесі мәселе, университет Ғылыми кеңесінің 2022 жылғы 24 қарашада қабылдаған шешімдерін іске асыру жөніндегі Жол картасының орындалуы туралы Стратегиялық даму департаментінің директоры М.Жумабекова есеп беріп, ондағы орындалмаған кейбір іс-шараларды іске асыру бойынша департаментке операциялық жоспар әзірлеу ұсынылды.
Ағымдағы мәселелерде келесідей сұрақтар талқыға салынды: оқу, оқу-әдістемелік, ұйымдастырушылық-әдістемелік, ғылыми-зерттеу және тәрбие жұмыстарын жоспарлау үшін 2024-2025 оқу жылына арналған уақыт өлшемдерін бекіту; жаңа білім беру бағдарламаларын бекіту туралы, оқулықтар мен оқу құралдарын баспа бетінде жариялауға рұқсат беру; академиялық мәселелер жөніндегі департаменттің ішкі нормативтік құжаттарын қарастыру; белгілі себептерге байланысты магистранттардың ғылыми жетекшілерін ауыстыру; университет базасында Халықаралық ынтымақтастық және академиялық ұтқырлық департаментінің жетекшілігімен TOEFL (Test of English as a Foreign Language) орталығын ашу.
Сондай-ақ Мәдениет қайраткері, «Сәулет және дизайн» кафедрасының профессоры Байтенов Мәжит Садықұлы «Қазақстанның еңбек сіңірген қайраткері» құрметті атағына ұсынылса, ауыл шаруашылығы ғылымдарының докторы, профессор Қазыханов Рашит Қазыханұлының кандидатурасы Қазақстан Республикасының Ұлттық аграрлық ғылым академиясының (ҰАҒА) құрметті мүшелігіне (құрметті академик) сайлану үшін ұсынылғанмен, талқылау барысында Ғылыми кеңес мүшесі - профессор А.Бұлашев Рашит Қазыханұлының баға жетпес еңбегі мен тәжірибесін, мамандар даярлау ісіне сіңірген қызметін, ғылымды дамытуға қосқан зор үлесін алға тартып, оны толық мүшелікке (академик) лайықты үміткер ретінде академик лауазымына ұсыну қажеттігін айтты.
Сонымен қатар, кеңес мүшелері А.Бегенова, әрі ғалымның ізбасары Д.Ибраев сөз сөйлеп, өз қолдауларын жеткізді.
Ғылыми кеңесте күн тәртібіндегі барлық мәселелер қаралды және талқыланды, отырыс регламентіне сәйкес барлық қажетті мәселелер бекітіліп, қабылданды.
